أوّل كتاب من ميغافون صار بين إيديكن:

رجعت الحرب قبل ما توقف من جديد. هالدورة صارت مألوفة بالمنطقة عنا: بيستمرّ العدوان تحت عنوان محادثات سلام، واتفاقات أمنية، ولقاءات دبلوماسية، و«مناطق تجريبية».

اللي عم نشوفه بجنوب لبنان وغزّة بيأكد إنّه هاللغة الدبلوماسية ما بتوقّف دمار الحرب، بس بتغيّر شكله. الاعتداءات على القرى مستمرّة، والعودة بعدها غير آمنة، والضغط والمراقبة والسيطرة الإسرائيلية متواصلين، رغم تقديم كل هالخطوات كأنّها مسار نحو سلام ما.

بهاللحظة المتوتّرة، التقى الرئيس جوزاف عون دونالد ترامب بواشنطن. بلبنان، انعرضت الزيارة كنجاح دبلوماسي أعاد البلد لدائرة الاهتمام الأميركي، ورجّع للرئاسة جزء من حضورها الدولي. بس أبعد من صورة اللقاء، ما كان في نتائج فعلية: ما قدّمت الولايات المتحدة أي تنازل واضح، وما مارست ضغط جدّي على إسرائيل، وما أعطت أي وعد بالانسحاب، ولا غيّرت موازين القوى اللي بتسمح لإسرائيل تكمّل بفرض شروطها على لبنان.

والأهم، إنّه الزيارة ما حسّنت الوضع بالجنوب. تجربة «المناطق التجريبية» ما أعطت لحدّ هلأ أسباب كثيرة للأمل. بدل ما تفتح طريق لعودة آمنة، عم تظهر كأنّها بتحطّ أجزاء من الجنوب تحت مطالب إسرائيلية وترتيبات أمنية مشتركة، بينما الناس اللي بدها ترجع بعدها عايشة بحالة من عدم اليقين. ونحن مشغولين بمناقشة منطقة تجريبية واحدة، عم تفجّر إسرائيل عشرات الضيع التانية.

كشفت الزيارة محدودية الهامش الدبلوماسي المتاح للبنان. وكشفت كمان كيف عم يضيّق المسؤولين اللبنانيين خيارات البلد أكتر، من خلال وضعه بشكل أوضح ضمن محور إقليمي بوج محور تاني. والنتيجة هي موقع لبناني أضعف: الدولة عم تفتّش عن الأمان من خلال الاصطفاف، بينما الجنوب بعده عم يدفع ثمن حرب عم تنعرض كأنّها مسار سلام.

إطلاق كتاب «إلى زياد»

بعد إطلاقه بمترو المدينة، صار كتاب «إلى زياد» متوفّر بالمكتبات المذكورة أدناه. بيجمع الكتاب نصوص ورسومات ومواد أرشيفية، وبيقدّم طرق متنوّعة لنتذكّر زياد الرحباني. كتاب للاحتفاظ فيه، والرجوع إله، ومشاركته مع غيرنا.

احتفلنا بالإطلاق بسهرة جمعت الحوار والموسيقى، وقدّمت نظرة أولى من جوّا الكتاب.
 إذا ما قدرتوا تكونوا معنا، شوفوا أبرز لحظات الإطلاق بالفيديو أدناه.

مجلس النواب والحكومة

من جديد تحت الضو

أظهرت أول جلسة تشريعية لمجلس النواب بعد ما مدّد لنفسه كيف بعدها التعديلات بآخر لحظة، والمساومات السياسية، ولعبة النصاب، عم ترسم مسار التشريع.

الدرون فوق راسنا

تاريخ الدرون والحياة تحتها

صار حضور الدرونز دائم بحياتنا. بهالسلسلة من جزأين، بتتبّع جويل بطرس كيف تطوّر استخدامها العسكري الحديث بالمنطقة، ودور لبنان كملعب لتشكيل حروب الدرونز، وبتشرح تأثيرها على الناس اللي عايشين تحتها.

الملعب

🎧 شو عم نسمع

هالشهر، محمد غربيّة عم يختار الموسيقى. انضمّ لميغافون من كم شهر، وبيتولّى قيادة فريق التوزيع، يعني غالباً بيكون آخر محطة قبل ما يطلع شغلنا للعالم. البلايليست تبعه بترجّعنا عالتسعينات، بين خشونة نيويورك ونعومة الـ boom bap.